تمتمات القصايد

همن اسرنا ظلمه اليوم سايد
في سوق جرمه زايدٍ حدة السوم

في بسمته ضجة بروق ورعايد
وبدمعته لحدٍ ينادي على القوم

ضاقت نفوس مثقله بالحقايد
والقلب يبكي داخل الصدر مهموم

الناس اشكال وصنوف وعقايد
من بينهم انذال واصحاب وقروم

ناسن لظاها باعمق الصدر قايد
و ناسن تخبي الجرح والهم واللوم

وناسن هدبها والمدامع شهايد
خطت على الخدين غيران وسهوم

وناسن تحبك لجل تجني الفوايد
وناسن ثغرها بضحكها دوم مزحوم

وناسن تغني ومسرفه بالموايد
و ناسن املها بالعشا بات معدوم

وناسن تحب وجوفها الحب زايد
و ناس القطاعه والخيانه وهم توم

وناسن هواهم بين قانص وصايد
لعب وهزل واسلوب واطي ومسموم

وناسن عزيزة نفس والعز رايد
ماتنثني للي به العز معدوم

وناسن تكابر.. فعلها اليوم كايد
غاصت بحور واصلها تجهل العوم

وناسن تلاقيها بوقت الشدايد
وناسن بوقت العُسر اذناب ورخوم

وناسن لها كف الامل والسعايد
وناسن بيمناها الفرح دوم محسوم

وناسن مناظرها تضج الركايد
وناسن كدرها بدفتر الوجه مرسوم

وناسن على ناسن تجرّ النكايد
وناسن تعيش بعمرها امن وسلوم

ماعاد نلقى وسط اهلنا سنايد
تسند ظهر من هدته رياح يحموم

والحب فيها ترجمه للمصايد
فيه النهايه قلب واحساس محكوم

الحب روّح يوم راحو الروايد
ومابقى من خلفهم..كذب مركوم

مهما انتظاهر فيه عنصر محايد
يظهر جلي في لمحة العين مختوم

هذا بعض من تمتمات القصايد
واعظم شعورن داخل القلب مكتوم

من سبته صارت حلومي كسايد
ماعاد يقبلها العمر دون مرسوم

يعني من الاخر.... بنبقى طرايد
الحب واحلامي وانا وحظ مقسوم

لين الكفون تعيد فينا العوايد
فيها البياض يلامس احساس مهزوم

او قلب يصحى عن مشاعره ذايد
والا بعيش العمر من دون مفهوم