دم الوفـــا - عبداللطيف العوفي

الصبح طوّل وهمي دق لي صدره
بالغصب والطيب خاويته وخاواني

دام الحشا منحرم من نوره وبدره
وش لون الوم الظلام اللي تغشاني

يانادر الوصف يالأندر من الندره
ياصبحي اللي تنفسته وصحّاني

لاتنكر الحزن شف دمعتك منحدره
خل المكابر ترى عمر الجفا فاني

مادام مالك على طول الجفا قدره
وش بك تهدد تقاطعني وتنساني

واللي يداريك ياخدر العيون إدره
ترى الزمن ينصف المجني من الجاني

مازال للحب سدره عش بهالسدره
وإنعم بضل الغصون الوارف الحاني

دم الوفا محصن ولاينفعك هدره
لاتقتله عمد وتعوّد تحداني

طعن الهوى خنجره مااقوى على غدره
خلّه لعذالي اللي عنك ينهاني

أودعت سر الغلا بعيونك الخدره
لاتترك الدمع يكشفني لعدواني

قلبٍ سما بك غلا حافظ على قدره
من حطك الأول اصحى تحطه الثاني

وان كان مالك على طول الجفا قدره
عوّد لدرب الوفا والود تلقاني .

. عبداللطيف العوفي .
© 2022 - موقع الشعر