الافيـه ,, - خالد بن سهيل العبيريد

الالف أولف ماطرالي من القيل
من خاطر ٍ سلواه بدع التماثيل

قصة غرام وسببة لي غرابيل
والله ولي النفس عالم خفاها

والبا بديت الحب مع داعج العين
اوفيت من قلبي لكل القوانين

حب وفاء وخلاص من بين قلبين
يشكر هوا نفسي ويشكر وفاها

والتا تبعت القلب في كل مشهاه
يقودني واطيع من خاطر رضاه

ولافكر بوقتي ولاعرف خفاياه
الا بعد نفسي زماني وطاها

والثا ثلاث شهور حاير ومحتار
اسلي الخاطر بترديد الاشعار

صد الحبيب وشب في خافقي نار
ونفسي بلاها الشوق لاواعناها

والجيم جمر الشوق من زود في زود
شفت العنى في كل الايام والسود

اسلي الخافق تريح يبي يعود
والعين مانامت تزايد بكاها

والحا حرمني لذة الزاد والنوم
من شاف حالي قال مرضان مسموم

اضحك وجامل والحزن في مكتوم
اخاف من شر النفوس وغثاها

والخا خفق قلبي يبيه ويريده
لاكن صد ولافتح لي بريده

عذب فوادي بالطعون السديده
واقفى وداره ماعرفنا قراها

والدا دوايه قرب خلي وشوفه
لوكان مالمست كفوفي كفوفه

ارسل ضروفي ماتجيني ضروفه
والنفس من صده تبيح عزاها

والذا ذهل فكري بوصفه حبيبي
دايم وصوفه حاضره ماتغيبي

الله عطاه الزين واصله عريبي
نسل الشيوخ الي تخوف عداها

والرا رماح الصد باقي اثرها
داخل فوادي نور عيني حفرها

احتار منها من بعينه نظرها
عجز طبيب القلب يعرف دواها

والزا زماني في حياتي يعاند
حالي نحل مالي عوين ومساعد

احسب ليال العمر وتمر وأعد
وسود الليالي كم مثلي شكاها

والسا سعيد الحظ من فارق الحب
عايش حياته ماسعى يرجي الطب

وانا على نار الغرام اتقلب
نار ٍ حطبها جل يذهل سناها

والشين شاب الراس ماحان شيبي
توي شباب وصرت بأمرن عجيبي

لاكن صابر ماحصل من نصيبي
دنيا الشقى محد ٍ وصل منتهاها

والصا صبرت وقلت ماصار مكتوب
ودرب الهواء قد قيل صايب ومصيوب

يالله تصبرني بصبر ٍ كما ايبوب
ياقابل الدعوه لمنهو دعاها

والضا ضروفي ماتجيني على الكيف
حتى سنعها يعترض لي صواديف

والارض ضاقت بي من السيف للسيف
لاكن ضروف الوقت محد ٍ قواها

والطا طبلت الزين يرحم فوادي
ينزف من الحرمان مالي جلادي

لكن طبعه مايكب العنادي
حسبي عليه الله حياتي كواها

والظا ظلمني بالجروح العميقه
وحمل محبه حمل ماهو يطيقه

اطرد سرابه لاتبين بريقه
والكبد لوعها ولاأروى ضماها

والعين عاجز لرفع الصوت للناس
اخاف من هرج المعادين الانجاس

مغير ادق الصدر واقول لاباس
وموق النواظر يحرق الخد ماها

والغا غلبني بالهوا كامل الزين
فجر عروق الدم وسط الشرايين

ولاني بالاول خسر قبلي محبين
أكبر ضحيه قيس ليلى فداها

والفا فرح في حالتي كل عذال
اهل الحسد ماشين في كل موال

أهل القلوب السود شينين الافعال
متى يقولون الله الي فناها

والقاف قام الدمع يعمي عيوني
والقلب يشكي من كثير الطعوني

تكفون يأهل الطب ماتنقذوني
صرخة طعين الوجد باقي صداها

والكا كلام الناس عيا يفيدي
سيف ٍ يحز الكبد ضمن الوريدي

لاكن ابصبر لو زماني عنيدي
والنفس ابدل عن غضبها رضاها

واللام لولا الشوق ماكان غنيت
الشوق يكويني وعلى الوصل حنيت

عزالله اني بالمحبه تعنيت
والزين طب النفس وغاية مناها

والميم من جرب جروح المفارق
يمسي بغبات الغرابيل غارق

ماله دوا من بين كل المشارق
يموت وجروحه مضني نساها

والنون نامت عين خلي ثم ارتاح
وانا اتقلب ماتهنيت بمراح

والدمع في موق النظيرين فواح
وخاف من دمعي يسبب عماها

والها هويته مير صد ونساني
ياقو بأسه كيف خان وكواني

جعل فوادي من فراقه يعاني
والنفس عجزت لاتحصل هواها

والواو ولع خافقي سيد الاحباب
وبين الرجاء واليأس واقف ومرتاب

مغير اعض ابهام كفي بالانياب
ويالله نفسي لاتخيب رجاها

واليا يقولون المحبه صعيبه
والهجر جرح ٍ للحبيب وحبيبه

انا اشهد ان الهجر هم ومصيبه
والوصل طب ٍ للجروح وشفاها

واختامها وعداد ماترزم رعود
وعداد مانسنس وماهبة النود

بذكر الله الوالي وهو خير معبود
وصلو على سيد المخاليق طاها

© 2024 - موقع الشعر