شقاوة طفوله

ودي تعود أيام بِيضْ الطِباشير
أيّام حلّتها شَقاوة طفوله

أيّام عِشناها بِحُلْوِ اْلتَعابير
واللي يحلّي وَقْتَنا ما نِقوله

عشنا نطارد القطط والعصافير
نوضع فخاخ الطير ننطر دخوله

نجمع بقايا من خشب والمسامير
نصنع لنا قارب يشد الحموله

نشري(خُيوط الصَيدْ)(ثِقْل)(وْمِجادير)
لما نشوف الصيد باين عدوله

كِنّا نِقَضّي الوَقْتْ كِلّه مَشاوير
نِلعَبْ مَتى رِدْنا بَليا عُموله

كنّا ليا منذوقْ حلوى طوابير
يالله عَسى دورك يجي بالسهوله

عند العطش عدنا الينابيع والبير
عدنا دلو في الماي داعب سيوله

ليتْ الزَمَنْ يَرْجَعْ من أوّلْ عَلى خَير
ودّي نِرِدْ لأيّامْ كَانَتْ خَجوله

وَقتْ السَهر كنّا لأمنا نواطير
تِسْرِدْ قصصْ والرايْ تِلقى قُبوله

كانت قصصنا تحتوي عبرة الغير
وشلون كانوا يوجدون الرجوله

تحكي عن الواقع إذا صار تغيير
تطرح مشاكلنا و تطرح حلوله

ولا قصصنا اليوم تنقال تعبير
لاهي من الواقع ولاهي بحوله

رغم التحول في البشر والمعايير
بعض البشر مازال فاقد عقوله

كِنّ الأمِسْ هِجْران ومْسَافَر الطَير
خلّه بَقايا نِشْأته بَاْرْضْ دُوله

ودي تعود أيام بِيضْ الطِباشير
أيّام حلّتها شَقاوة طفوله