بنت الكرام - سليمان السلمي

خلاص أبا أرحل عنك يابنت الكرام
وش فايدة قربك إذا قربك هموم

كنتي وحيده بارزه بين الزحام
وأخترتك أنتي والبشر فيني تلوم

كنت أحسب أنك درب لضايع أمام
وأثرك طريق يضيع اللي به يهوم

ايو الله أدري ماتدوري الخصام
لكن ذا طبعك ولا أدري من ألوم

جيتك وأنا ضميان وركابي حيام
وأقفيت وأنا منك ضامي وامحروم

ياما قضيت الليل من أجلك قيام
وياما على شانك رسمت من الرسوم

ماكنت أعرف الحب وأسلوب الهيام
ولاكنت أشيل من الثقيل إلا اللزوم

طفلن تعلم من شقاه الاحترام
لوتنعرض له غايته عيا يسوم

لاقيل بكره عيد من بدري ينام
حتى يجي بكره ومن بدري يقوم

يكون أول شخص يحضى بالسلام
ويعايدك ويقولك عيدك يدوم

كم مرتن عندك تلعثم بالكلام
حاول يعبر بس خانته العلوم

كان يتلذذ منك بطعون الغرام
ويقول طعنة حب من كف رحوم

وأنتي صغيره ماتعرفين اللثام
وتعاندين وتلبسينه كل يوم

ياماترقب طلعتك بعد الدوام
وإن شافك أقبلتي يرحب بالقدوم

وأنتي تردين التحيه بابتسام
وتبادلينه بالغلا والحب دوم

لكن كبرتي وابتديتي بالخصام
وصحيتي المشتاق من عذب الحلوم

واليوم صرتي ماتردين السلام
وبعد الغلا صرتي عليه راس قوم

قصه غريبه وانتهت قبل الختام
وأنتظرو الجزء الأخير من الهموم

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر