دنيا العنا - بدر الروقي

دنياي من كثر العنا طوحت بي
دنيا تقلب بين يومٍ وليله

أسهر لياليها وأداري وأخبي
أكن همي جوف صدري وأشيله

سايرت وقتي بس وقتي غدر بي
أركى على متني حمولن ثقيله

لو كنت توي في بدايات دربي
العمر يمشي والمسافه طويله

الظاهر أن الحظ الأقشر عثر بي
والحظ لامن طاح مافيه حيله

الله يستر كان دربي وقف بي
وأنا معنّا تحت رجلي مليله

النار من بين الحنايا تشبي
نارن حطبها من ضلوعن نحيله

أن جيت أسلي خاطري ولعت بي
عمر الفرح بأيام عمري قليله

بس الأمل موجود والرب جنبي
ماخاب من له في زمانه وسيله

يالله هونها دعيناك ربي
يالله عني كل همن تزيله

مافيه غيرك لا دعيته يلبي
أنت المهيمن وأنت راع الفضيله

© 2024 - موقع الشعر