افرح بشوفك - سلطان بن دحيم

انا افرح بشوفك يا هوى البال بس الموت
ليا من ذكرت ان المفارق تواليها

يصير الفضاءفي عيني اصغر من التابوت
وتحيى الجروح اللي بشوفك مداويها

جروح ٍ سببها شفتن مثل لون التوت
وعين ٍ هدبها نصف الاوجان غاطيها

ليا سلهمت ما عاد تسمع لي اية صوت
وتناجا العيون وشرنا من تناجيها

نسولف ونفهم بعض لوكان حنا سكوت
وتبين العلوم اللي عن الناس نخفيها

علوم ٍ نخفيها عن الحاسد السربوت
ضعيف ٍ اليا اوحاله علوم ٍ يوفيها

يزود عليها والنميمه تهدم بيوت
ونقالها يبشر بنار ٍ يصاليها

و لو ان محبتنا كما عقاب هو ونوت
محبة شرف ما تنتغير مباديها

و يا خلي ترا حبك بوسط الحشاء منحوت
محبتك في قلبي ولا ني بناسيها

من اسبابها نفسي ما تقبل شراب وقوت
ما تقبل لذيذ الزاد من عقب غاليها

ومنها سهرت الليل والمسلمين خفوت
ومنها ياكم هلت عيوني عباريها

ومن شين حظي صار هجسي كما الريموت
ليا جيت ابى ادله ذكر العين مشقيها

عطيتك كلامن من صميم الحشاء مثبوت
كلام اللذي نفسه غرامك معنيها

تغانمني بوصلك قبل لا يفوت الفوت
ترا الوصل زادن للمحبه يغذيها

وعسى الله يجيب الدره اللي ببطن الحوت
ونرتاح من شر المحبه وطاريها

© 2024 - موقع الشعر