بحور الشك

لـ بنت حميد، ، في غير مُحدد

بحور الشك - بنت حميد

انا ماني سواة اللي توطي راسها بالقاع
تجيد الهرج بلحونه تواعد من يواعدها

رقيت برجلي العليا ودربي غانم ما ضاع
وعوايد ربعي احفظها وعلى دربي بعودها

لبست من العقل حكمه وغطاني العقل بقناع
اخذت من الوفا طبعي صفات الخير امجدها

اطوع بالعقل عقل بحياته قاسي ما طاع
ظلام يحجب عيونه وانا صبحي يبددها

ضويت بداجي الظلما شموعي والعرب هجاع
علوم المعرفه دايم على فراشي وسايدها

عرفت ان الهوى ساري وعرفت ان البشر انواع
مشاعرها على موجه تذوبها تجمدها

شريت من العرب شاري وبعت من العرب بياع
سوالف بالقفا ماني مع العالم بطاردها

انا ماني سواة اللي تجي مع دقة الاصباع
انا خيل بلا فارس عجز منهو يجودها

© 2024 - موقع الشعر