الصآحب المعهود - عبدالمجيد الظويفري

يجور الزمآن ونطلب العون يامعبود
على اللي يجينا من عناه وصواديفه

زمآنٍ يعوق الرجل ويعيّب أهل الجود
على أهل الوفآء والجود جآر وشهر سيفه

ولآ عآش فيه إلآ هل النم والمنقود
رعوا في مفآليه وتعلوا مشآريفه

إذا جيتهم سولف ولدهم يمين العود
يجي منتفخ بطنه بكثرة سوآليفه

يحب المدايح والنبايح قليل الفود
يجيب السوآلف مآتوآلف ،على كيفه

أنآ راعي الفزعه وأنآ مزبن المضهود
وإذا بان ذكره / خآب ذكره وتعريفه

هذا ماهو مني ولاني معه معدود
أدور على الطيّب بطيبه وتشريفه

وأنآ كل مآهبت عليه هبوب النود
لزوم الهوى يمي يعج بعواصيفه

عسى الله يبآرك في رجالٍ ذرى وعضود
لآ جآر الزمآن وناشبتني ملاقيفه

ترى فزعة أبيض وجه وقت الليال السود
بروقٍ تكاشف في سماي ومراديفه

يكفيني إنه يبذل الجهد والمجهود
على فزعته يرخص عنآه وتكآليفه

ومآدام الوفاء دينٍ على أهل الوفاء مردود
أبتعب على ردة وفآه ومعآريفه

لآ جآر الزمآن ودآر بالصآحب المعهود
أبآقف وهو لاشك يحمي مواقيفه

وأنا كل ماهبت عليّه هبوب النود
لزوم الهوى يمي يعج بعواصيفه

© 2024 - موقع الشعر