أربع واربع

هذا الزمن في عصر ثبّت وانا اشوت
بين الطمع واهل المبادي خناقه

الجاهل يسولف واساتذته سكوت
وسيع وجه ويدّعي بالطلاقه

صار البحر ماله جماله على الحوت
والنوخذه ملّ وزهق من حداقه

الوصل بزنس /والرحم جمعة بيوت
الابو ماله بابنه الا البطاقه

ياصاحبي صار اصدق الناس ممقوت
والكذب صار الوان والغش اناقه

واستشيخ اللي من قبل كان هلفوت
لو هو قبل ماله مع الذود ناقه

لاشك خذ من صاحبك عدّة بيوت
نويت اقدم لك مع الود باقه

فيه اربعٍ من دونهن احسن الموت
{دين /وشرف/مع حسن صيت /ولباقه}

من دونهن ماتشعر بلذة القوت
متّن لهن حبلك وجوّد وثاقه

وفيه اربعٍ في كسرهن مالهن صوت
{قلبك /ووعدك/والثقه/والصداقه}

وفيه اربع اتركهن قبل فايت الفوت
{هونٍ /وتسويف/ونفاق /وطفاقه}

وفيه اربعٍ مايبنن لشخصك بيوت
{كبر /وريا/مع حب ذات /وحماقه}

واللي يحب الطيب بالطيب منعوت
واللي يحب العيب معثور ساقه

عبداللطيف العوفي