6 \ 6 صادف ليوم الاثنين .. - دلان بن مساعد

البارحه جريت صوتي وأغني
سته وسته صادف ليوم الاثنين

في ليلة ٍ والهم كنه / وكني
مثل الفقير اللي قضا دينه بدين

هذاك يومنه كلامه سحرني
لاقلت له : من وين ؟ ايقول : من وين ؟

ولا قلت له اسمك ؟ سكت ثم حقرني
ولامن سألته ؟ جاوب وقال بعدين

ويقول عندي درس !.. وقتي جبرني
لكن بكره / يصبح العيد عيدين

انشهد انه في زمانه غلبني
وسبب لي الهوجاس والناس ممسين

وانا وريث المجد / ماخاب ظني
رجل ٍ اشيل الحمل بالعسر واللين

دلان ابن دلان ../ من صغر سني
عقلي براسي واقسم الصف صفين

لو يجتمع بالكون ميتين جني
ماضاق صدري ..دايم ادروبنا يمين

وانتى يابو عود ٍ دقاق امتثني
عطني علومك .. شوف خضر البساتين

مير البلا لاصرت مطرب وفني
وتكتب جزيل الشعر قاف وموازين

وتقول : رد العلم مني وعني
وماتدري اني شاعر ٍ فالميادين !

بووح المشاعر شعر فيني / ومني
وانا رجل فيني من الشين / والزين

لكن اشوفك يالغضي تمتحني
لاسباب مدري .. خلها بين قوسين

وانتى / وانا .. وهموم صدري حدني
اما كحلنا العين/ .. والا عم العين !

© 2024 - موقع الشعر