تضحك على اسمي

تضحك على اسمي تظن انه يفشلني
ماتدري اني عزيز(ن) بأسم شيباني

امثل اسمي على سلمن يشرفني
واعاند الوقت لامنه تحداني

انا عوض جملة إحروفي تعبرني
في كل حرف(ن) معي حجة وبرهاني

"العين" عزة يميني ما تنزلني
عن منزل(ن) جيت له من طيب جداني

"والواو" وافي عسى الله مايخسرني
فزعات راسي مع اللي صاح ينخاني

"والضاد" ضاقت صدور ولا تضايقني
اقداري اللي تبين صادق ايماني

امثل اسمي على فعل(ن) يمكني
اكسب محبة عيون(ن) جات تقراني

اجمل اللي ليا جيته يجملني
وادوس خشم العدو لاصار يعصاني

عوض لحاله ولابه من يقاسمني
بفعولي الشامخة ولحون قيفاني

(ما اقول ماخطي) لكن الله يقدرني
احفظ حدودي واقيد زلة لساني

والزلة إن جات من غيري تخبرني
إني مضيق عدو من طيب سيساني

وإن (السكوت) إن لزمته مايحقرني
لأن به شي ينصحني وينهاني

اخلاقي الشامخة تأبى وتجبرني
أصد عن زلة الجاهل لا يبلاني

والأسم يا جاهلة ماعاد يحرجني
لاصرت قدم العرب ماجلس مع الثاني