كل يوم راح من عمري خساره

كل يوم ٍ راح من عمري خساره
(دون وصلك) وش ابي بالعمر كله

ياللبيب اللي فهمني بالاشاره
ماحصل في يوم منّك شفت زلّه

وش بقول وشاعرك حبك شعاره
مابغا غيرك ولو غيرك حصل له

ياقمر ليله ويالشمس بنهاره
مابكونه شي غيرك جايزن له

بك تنور دنيته من دون اناره
وبك تحقق منيته مادمت خله

شاف بك عفّه / وبك طيب / وطهاره
ماكنك الا بهالثلاث مشابه ٍ له

ياربيع العمر / يالزهر / وخضاره
ياورود الحب جوريّه وفله

في غيابك / الف معنى للمراره
والبلا فوق المراره الف عله

في منامه ياحلو منك الزياره
وياحلاتك في حلومه زاير ٍ له

السفير الطيف واشواقي سفاره
وانت لك دوله بحبك مستقله

يا امير القلب / لك صدري اماره
يوم حبك جا لقلبي واستحله

يابعد كل الاسامي المستعاره
شاعرك شاف بعيونك موطن ٍ له

ماقصد من هالقصيده لك اثاره
جات لك فنجال حب / والقلب دله

دون وصلك كل يوم ٍ له ( خساره )
ياعسا يفداك هذا الكون كله