الهنوف الي تلوح من شمالي بالشمال
اعرف اللي ودها به وهي تدري ويش ابي
تنظر بعين الغرام وترتجي امرٍ محال
اسكنتني لين صارت حرف شعري واكتبي
قد شربته بالهوى شرب القهاوي بالدلال
بدر غازي لين صارت اقرب ألقاب إلقبي
وهيْ باليمنى تخط الباء وفي يسراه دال
وباقي الرا في العيون وخافقه فيه إنسبي
لين صارت ثم صارت بالهوى تهوى الدلال
لين صارت تطلب اللي ما اذكر انه مطلبي
ثم قامت بي جنون الجن مع وقت الزوال
عقب ماودّع نهاري مطلع الصبح الابي
قلت انا اخو بندر اللي مايعيل ولايعال
ولاوعيت الا ويدّي من قهر فوق شنبي
ان هوينا ماهوينا حرم يابنت الحلال
وان مشيت الدرب والله ما انثنى به منكبي
اعشق من العشق صفوه واشرب من الماء زلال
واعشق اني بالوفا والعز اوصل مأربي
واعشق اني بكل شيمه امتلك صعب المنال
وبالوفا آخذ فصاص الفض واعطيك إذهبي
بالوفا واعيدها وكلي فخر في كل حال
غيرها لا لا وناري ماتشب الا حطبي
قلتها وارجوك انك ماتعيدين السؤال
الصبي اللي يحبك يحشمك نفس الصبي
يابنيه كل ماطالعت قلتي لي تعال
كن عيني عين صقرٍ لالمح زول الضبي
والبلا لن كان حطيتي على وجنتك شال
والله انه مايوصلني لكم كود الحبي
حيلتي اجلس لأني ما آحبي صوب الجمال
لو خذا روحي اثنّي الكف من دون ركبي
لنني من روس قومٍ عندنا اجابه سؤال
ليه ؟ لني ابن غازي وافتخر دامه ابي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين