كف من دون اصابــع - بدر غازي

بتغيب ويغيب الفرح في غيابك
جعله يغيب العقل يالينك تعود

جعله يغيب العقل يانور عيني
وجعلي قبل غيبتك ماني بموجود

لني بدونك صدر.. مايسكنه قلبْ
ودربي ظلام وظلمته مالها حدود

لاغبت كني كف من دون اصابع
وكني قراحٍ في خلا ماله ورود

ملكتني من جال لاجال لاجال
وان غبت ماللفْرح في غيبتك فود

لنك بعيني شوف وبجسمي الروح
ياغايتي من جملة البيض والسود

ارجوك خذني في غيابك غيابين
ارجوك خذني في مدى وصلك سهود

ياللي حياتي بدونك اقسى من الضيم
لوّي كفؤ اليا قدح عود في عود

لاغبت .. عن فاهي تضيع الاسامي
ما اردد الا اسمك وخلق الله شهود

اوعد خفوقي من خفوقي واسافر
يم الوعد لو كنت ماني بموعود

اجمّع اغراضي واقص التذاكر
وامشي على رجلي وانا كلي وعود

اخايل غيوم السما والاماني
وغيومي اللي خلتها كلها رعود

ماعاد افرق بين صدفه وموعد
وتساون بعيني التساهيل والكود

لنك ذكرتي طاري البعد يالروح
وغاب الفكر ما فرّق النقص والزود

في غيابكم اذا كتبت القصيده
تقصدك لو ماكنت في الفكر مقصود

واذا بغيت اهجو الزمن والليالي
اكتبك مدح وداخل الخافق تسود

تسود في قلبي بياض المحبه
وارخي شعورٍ بالوصل كان مشدود

ارخيه وارخي لي الاذاني فديتك
اذا بغيت تغيب خذني معك عود

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر