بستاذنك ياوقت

بستاذنك ياوقت واسمع دقيقه
وأصغ انتباهك لي وتسلم ومشكور

ليه الوفا في دفتري ما تريقه
والفرح غاب وكاس الأشواق مكسور

وليه الحزن ماخذ عليّه وثيقه
الضيق ب(الطابور) والهم ب(الدور)

أصيح وينه وين صافي رحيقه
وين العهود اللي حلف كلها زور

يرجع صدى صوتي بهمسه رقيقه:
غدا الجفا سجان والبعد لك سور

صوت الأم وردة وصدري حديقه
والله يسامح من زرعها ومعذور

كله سبايب من نوى لي عويقه
وأجحف بظلمه والغلا صار لي جور

اللي غلاته غير كل الخليقه
واللي غيابه يطعن النحر والزور

ودي بشوفه بس كيف الطريقه
الشوق طاغي لكن الوصل محذور

قلبي غريق في بحور عميقه
يطيح قلبي لكن الراس ماجور

وقبل الوداع اسمع : وهذي حقيقه
خذها نصيحة عمر أو سمّها شور

لايحزنك لا شفت بالصدر ضيقه
أو شفتني في لحد الأحزان مقبور

وإن شفت عيني في بكاها غريقه
سلّم على دمعي وتسلم ومشكور