تجريح

تدري وش اللي يجرح القلب تجريح؟
انك تضحّي لْ قلب , باكر يخونك

تدري وش اللي يْزيد في الهم تبريح
انه يجيك يقول : ( لا ما أصونك )

ويكمّل الأسباب ويقول لا تْصيح
ما يدري ان الموت يسكن جفونك

تدري كثر مَ الروح تسبق له الريح
كثر الدموع اكثار واكثر شجونك

والوقت فيه ألوان رسمه لو تْطيح
في هالهوى ينشاف حبّه بِلونك

والناس ما جت يوم مع صدق تصريح
إلا إذا في شي , كلهم يجونك

العين فيها لوم , واللوم ما يزيح
عن ذا البياض اللي سكن في عيونك

والقلب فيه النبض .. والنبض ما يبيح
سدّه على ما مرّ طيفه بكونك

واعلم ترى الدنيا سوات المراجيح
مره تجي وياك ومرّه بدونك !