يـــــمّـــه

أحدٍ على نفسه يجيب الغرابيل
واحدٍ غرابيله تزيده شجاعه
واللي تثبتْه النوايب عنِ الميل
يثبت محبّه للثبوت و قناعه
وان قال ذاك اللي تقّول أقاويل
أسمعْه لكن ما عَرِف له بضاعه
يمّه ونا رجّال صمصام حلحيل
تقوى على هزّ النوايب ذراعه
وان جات عندك شايله للتساهيل
دقّت تحيّه لك بسمعٍ وطاعه
أصلا يميني مالها فيك من حيل
إلا سلامٍ ممتلي بالوداعه
يا طيّبه طيبك تعدى المعاديل
والطّيب له عندك مطالب طماعه
يا مشعله دربي بنور القناديل
إنتي لوحدك من طبعتي طباعه
وانتي لوحدك عارفه بالتفاصيل
صوتك لوحده تألف اذني سماعه
لا تاخذك يمّه شكوكٍ وتأويل
العلم عندي والسوالف صناعه
حبّك بقلبي ما خذوه المعاذيل
اللي لهم في كل وادي شفاعه
لا والذي جملك فالعين تجميل
مقوى على فرقاكِ لو ربع ساعه
لكن ظروف الوقت فيها بهاذيل
تفرض على الرجال غير انطباعه