كسر الخطا

شوف الزمان اللي جمعنا بالف خير
ماله على لمّ الشمل حيل وقدر

حتى المكان اللي جمعنا له ضمير
شكله خذا منك ضميرك يا قهر

كنت احسب انا في لقانا شي غير
كنت احسب ان النجم شاركنا الخدر

اتري نجوم الكون صدّت عن حقير
لا جت تشاركنا ولا جانا قمر

والصبح لامن أشرقت شمسه ينير
فكري وافسّر حلم في تالي السهر

أتري حلومي ضغث تفسيره عسير
اتري ظلامي شر وانواري حذر

والمبسم اللي لا غدى منك ظهير
تركيز كلي : كيف اغضك يا بصر؟

أتري عيوني قبل قلبي تستعير
غضت بصرها كنّها عند الخبر

وآناللي توني أكتشف انك جدير
بالصد لما شفتني مثل البزر

كانت تفاصيلك حروفك والمثير
ان الكلام اللي تقوله ع الوتر

تحلف تكمل كذبتك كنك خبير
تحسب نهاية هالخطر ماهي خطر

جيتك وبيّنت الخطا وآنا أشير
إني بسامح لو حصل منك عذر

جيتك وقلت افلان لك رب(ن) بصير
وجهي توافقني / تخالفني ابظهر

والحمدلله يوم يكشفلي المرير
وبشوف عيني .. وين ألاقيلي صبر ؟

مهما تقول انك على وضعك حسير
وانك على زود الفرص عندك شكر

وانك مراح تكون للفوضى أسير
وانك تبي مني عفو عن ذالوزر

شوف الزمان اللي جمعنا بالف كير
ماله على كسر الخطا عندي جبر !!