بالعين نظاره وباليد اي فون - خلود الهاجري

بالعين نظاره وباليد اي فون
وبالقلب طيبه زايده مااعدمها

مع (شفته) كل الاوادم يخقون
و(بسكسوكته) يذبح ملايين منها

والله مدري كيف غيره تحبون
وقلوبكم وشلون غيره سكنها

ماشوف انا غيره حبيبي بهالكون
ومشاعري نادره ولا فيه منها

لوهم ولاة الامر في شوقي يدرون
كان شيدو جسر المحبه لهلها

بين الكويت وبين ديرته بيكون
ولوهي المسافه تطول ماحسب عددها

ياليت بدياره عذارى يسوقون
لاجيه (بالفكس ار) اجرب دبلها

ياذوق ياروعه ياغالي يامزيون
مكانتك عندي مااغيرك وصلها

ياليت مابه ناس لخدك يبوسون
وشفايفك ماهو لغيري عسلها

ياليتني بحظنك مقيد ومسجون
يازين هالسجون ولا ارضى بدلها

او ليتني بيديه يعالم اي فون
وباللمس لو يبغى عيوني اخذها

سلمتله نفسي وعيونه يمونون
كلي فدا عينه ورعشة هدبها

لو مت من نظرتك ياخلي تمون
قلبي واعرفه مايتحمل سهمها

وانت العدل يوم كلهم مايعدلون
وانت الوفا يوم الخيانه لهلها

تبقى وفي لو كلهم لي يخونون
ومنك اتعلم كل حاجه واصلها

هذي هي ابياتي وادري بتعذلون
بقولكم جريئه ولاحدن قد عسفها

وياللي تلوموني يعلكم تجربون
اصعب انواع الحب بالقلب كلها

تسهرك يوم الناس كلهم ينامون
عشان نعرف كل نفس وخجلها

ولو شفتوا خلي والله انكم تعذرون
ابيات شعري يوم قلت ادبها

احساسي ويترجم مقفى وموزون
وبختمها قبل العيد لايجيني منها

ولازم على محمد ختاماً تصلون
والحسنه لاتبعت بالسيئه محتها

وصلاة ربي عد مااهلت مزون
وعداد ماينزف علينا مطرها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر