من خذاه الموت وش ياخذ معه

الجحود انّواع يا شين الجحود
وعسى الله عنْ وطنّا يَقْلعه

ناكر المعروف خَوّان العهود
تَضْحك الدنيا عليه وتصْفعه

آخر المشوار يدْفنْ باللّحود
من خذاه الموت وشْ ياخِذْ مَعه

في زمانٍ فيه للكاذِبْ وجود
لا تِصَدِقْ كل شَيّن تَسْمعه

لو يموت الحِسْد في صدْر الحسود
حُوله العالم تحِصِلْ مَنْفعه

ما نِسامح صاحب الفِكْر الحقود
المُغفلْ في مسيره يتْبعه

نَتْبع الممدوح حلاّل العقود
عنْد وجْهكْ بالجهات الاربعه

للمراجل سوق وابْنوك ونقود
الحظيظ اللي مقامه تَرْفعه

يكْسب الوافي بدال النقْص زود
انْ حداه الضّيق عند الله سَعَه

مِنْ يشدْ الحيل يَقْدر لصعود
المواجب للمعالي تَدْفعه

من جِفاه العزّ يمكن ما يعود
مثْل من يَعْمي عيونه بصْبعه

لا قطعت الدرب بالْقلب الشرود
الثعالب كلّها مِسْتَسْبعه

الزمن يَمْشي على قَدْح الزّنود
من غشاه الخوف كلٍ يَصْرعه

يا هبيل الراي لصابر حدود
كل ما يصْبر تطيح الاقْنعه