نبع الحنان

ضميتها في خافقي مر الازمان
نبع الحنان اللي سقتني المودّه
ما كنّها إلا طير والعطف جنحان
أدفى بها لا زاد عالقلب بردّه
سودا العيون برمشها الكحل غرقان
إخت القمر بهدي لها القلب وردّه
حبّي لها ما حبّه إنسان لأنسان
من طيبها خوفي عليها أستمدّه
أمي لها فيني الغلا فكل شريان
من حبّها قلبي بها فاض سدّه
بنت الكرم مرفوعة القدر والشان
منها العطى يصْعب علينا نردّه
من طيبها قلبي لها دوم ولهان
إلها الغلى زايد عن الناس حدّه
لو كان لقياس الاحاسيس ميزان
حبي لها ما يوصل إحساس قدّه
أهدي لها عمري على وجه لحسان
وأبقى على موتي لها مستعدّه
قلبي لها لو خانه الوقت ما خان
والروح في عشقي لها مستبدة
ترخص لها لو تطلب عيون غزلان
و غيابها وش قيمة العمر بعده