زهم صخابرةٍ سواة النماره - محمد بن باني المخاريم

سلام ما هل السحاب بغزاره
وبلٍ من الوسمي مزونه محادير

عليك يا بدّاح يا ريف جاره
ياللي محلّك مدهلٍ للمناعير

ياللي حلالك ساعيٍ في دماره
للضيف والاّ للرجال المسايير

انت اللذي يعرف مع الناس كاره
ولك سمعةٍ بين الرجال المشاهير

عند اللّوازم ما تحسب الخساره
لا حسّبو بعض الرخوم المخاسير

ولك مجلسٍ من يبغي الكيف زاره
فيه الدلال مبهراتٍ مناحير

ماصك له بابٍ بليل ونهاره
واهل الوفا صوبه ورود ومصادير

يبغون فنجالٍ كثيرٍ بهاره
وحيلٍ شحمها مثل بيضٍ المقازير

والا يبون اللي كبيرٍ فقاره
مقدمٍ للضيف حشمه وتقدير

وطيبٍ ماهو منتوج راع العطاره
عودٍ فريد النوع غالي المساعير

الجاوي اللي واردٍ من دياره
على حساب مرخّصين الدنانير

ويبغون مطنوخٍ براسه سطاره
يعطي على شوف الضيوف التباشير

رمز الوفا والطيب علّق شعاره
وعلى طريق المرجله واصل السير

قرمٍ طريق المجد سار بمساره
ونهج مناهيج الرجال المغاوير

بدّاح شيخٍ منهج الطيب ساره
وفي المرجله ما طاع عذّال ومشير

طيبه وراثه وارثه ماستعاره
ذخر الرجال مفرقين الطوابير

جده يصبّح كل قومٍ بغاره
على ظهور مسودسات المسامير

فعل ابن عواد مع الناس شاره
في المعركه يرسي كما يرسي النير

لامن عجاج الخيل ثوّر غباره
هذي مقابيلٍ وهذي مدابير

كم شيخ قومٍ ياصله وسط داره
مع ساير الايام غزّاي ومغير

وخزيزته فالطرش ياخذ خياره
حيثه على ما قيل زيزوم وآمير

واليا رما سيد العذارى خماره
وصاح الصياح وصوبرن المظاهير

زهم صخابرةٍ سواة النماره
وارهو طعام معكفات المناقير

قومٍ ليا شنو على الضد غاره
ويروون عطشان السيوف البواتير

وارجع لمن بالطيب بانت اخباره
ليا اختفى صيت الرخوم المعاثير

بدّاح بسر العلم ولا جهاره
عندي على طيبه شهودٍ وتبرير

تبنى له البيضا على كل قاره
عد النبات وعد ما رفرفر الطير

ويفداه من قدم لضيفه عذاره
لو ان فلوسه فالخزانه قناطير

ويفداه لاشٍ ما براسه نعاره
ولد عجوزٍ مايعرف المعابير

واللي خلق كل البشر باقتداره
اللي بيده الملك والشر والخير

ماقلته ابغي من وراها تجاره
لكن اعبر عن هل الطيب تعبير

اللي جدار المجد زادو جداره
لين اعتلوا بالمجد روس المسابير

واتلى الكلام اللي كتبت اختصاره
ذكر الاله مدبر الكون تدبير

© 2024 - موقع الشعر