أبو متعب هو جملنا - محمد بن باني المخاريم

بادي باسم الاله اللي لنا بالخير جايد
باسطٍ سبع ورفع سبعٍ شداد بلا عمدها

فالقٍ حب النوى وان مد مامد الزهايد
والسحابه بأمره أضا برقها وأرزم رعدها

ياهجوسي حان وقت الجد في بدع القصايد
حضري وانقي بيوتٍ من سمعها مانقدها

من بيوت الشعر جزلات ومعانيها فرايد
كالجواهر غاليه وانا أتخيّر في جددها

القصيده لا وفت تلقى العرب منها فوايد
واعرف انها لا تردت من لسان اللي قصدها

جيت أشارك يوم حان الوقت ماخلفت الوعايد
والقوافي كل ماناديتها جتني جهدها

جيت يدفعني غلا لاغلا وطن والشوق زايد
مع رجالٍ للوطن توعد وتافي في وعدها

بث ياتلفاز واعلن يامراسل في الجرايد
عن سرورٍ عاليه وأفراح مايحصى عددها

فرصةٍ كالعيد وانا كلنا نبغى نعايد
المليك اللي علوم الطيب بسجله رصدها

أبو متعب للوفا والعز والنوماس رايد
الشجاع اللي فعوله بالوفا ماحدٍ جحدها

أشهد أنه للبلاد وشعبها للخير قايد
عايشينٍ في رخا وابلادنا ذعذع سعدها

دام عزك يابلادي والبسي كل الجدايد
وأفخري برجالك اللي كلها في راي أسدها

المليك اللي عسى أيامه على الدنيا مدايد
للبلد عزٍ ويقمع من يحاول يضطهدها

دولة التوحيد بأمرك يالكريم أبا الجوايد
بالأمان وطاعة الرحمان يارحمان زدها

ياعسى من خانها ماله على الدنيا شرايد
وإن حيا لعل نفسه مايفارقها نكدها

كلنا نستنكر اللي عن عقيدتنا محايد
ننبذ الإرهاب عن دار نعمنا في رغدها

دولة عسى مؤسسها بجناةٍ برايد
زال عنها الشرك وأمّن شعبها بانحا بلدها

فوق كورمصيحه ويصادم أصحاب المكايد
العرب هاذي يصبحها وهاذيك يهجدها

لين وحد صف شعبه وأمّنه وأطفا الوقايد
والبلاد أرسا قواعد ساسها وأرسا وتدها

لين صارت كالفتاة اللي زهت زين القلايد
الذهب في جيدها منضود والحنا بيدها

ماتغير في عقيدتها محرفة العقايد
ماحدٍ يخلف عوايدها وأبو تركي سندها

قال نومي في ذرى سيفي وكبري الوسايد
سيفنا يحماك واللي من وراه أمر وأدها

وخضعت له والتحم شعبٍ بها كانو بدايد
والشريعه حطها دستور حكمه واعتمدها

أبو متعب هو جملنا اللي تهابه في الشدايد
الجمال اللي تقطع عن شواربها زبدها

والمكارم كل عامٍ من بحر جوده تزايد
لاوله والثانيه والثالثه واللي بعدها

وأنثني في مدح أبو خالد مهون كل كايد
من ذكاه يناطح الصعبات ويحلحل عقدها

الشجاعه والكرم دايم لبو خالد عوايد
الدفاع يعززه وعداه ياقف في نصدها

ونايف اللي عن جميع أوطاننا بالحيل ذايد
شلة التخريب يبطل كيدها لا الله قردها

ماضي سيفه على أصحاب القشر ماهوب هايد
لين ينهيها من أكبر شيبها لصغر ولدها

ولانسيت أمير نجد اللي لنا ذخر وسنايد
درعنا لا ولعوا خشم الفتيله من زندها

سيدي سلمان أمير من وسيعين البنايد
من حرار تعجب القناص وينومس هددها

نصف قرن ونجد فيها العدل وايضا الأمن سايد
في ذرى سيفٍ ليا وقع على الروس يحصدها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر