ارسل ويمـك ماحسبـت الرسايـل

ارسل ويمك ماحسبت الرسايل
ومن كثرها محصيت يمك عددها

وبنيت لك مدينة(ن)كبر حايل
ودولة غلا وانته مؤسس بلدها

وعرف معي غلاك دايم وطايل
في عشرت(ن)خذيت مني سندها

اعلن غلاك ولا حسب قول قايل
وفي ماتبي اتبعك خذها وزدها

وبالظل احطك ونثني للقوايل
قل لي بعد وش تطلبه من بعدها

لياذكرتك قمت اجر المثايل
والهم والهاجوس نفسي هجدها

قلبي معك والعين يمك تخايل
ماخايلت غر المزون ورعدها

وبرق وربيع وبر رائع وسايل
ماصدها عن صاحب(ن)مافقدها

عليك وجدي وجد من جاه عايل
وساقه من السرعه وعضده حصدها

او وجد من حظه على طول مايل
عجز حياته لا يحقق سعدها

اوجد من شافت عذاب ونكايل
ام(ن)توفى بالحوادث ولدها

عليك ياوافي جميع الخصايل
لو ماوفت نفسك علي ابوعدها

تكفين والا العمر لو طال زايل
رؤفي بنفس(ن)قام يقبل نكدها