خـط السليــل

يوم حدرتي على خط السليّل
والله ان قلبي مع المحدار...حدر

بس انا..عديت في راس المسيّل
والحزن ورد على..عيني..وصدر

في نهار السبت دمع الهجر سيّل
والضحا فعيوني الثنتين غدر

مابقا لليد حيله....وتحيّل
قدر الله..بالفراق المر..قدر

سلوتي من بعد هجرش ياغزيّل
سلوة المشتاق لامنه تكدر

اتنصا غار سعدى ثم اقيّل
بالدلال الصفر والشاهي المخدر

دلة فنجالها مزعفر مهيّل
بنها من منطقة صنعاء مصدر

ماتساق الا على ناسن قليّل
للرجال اللي بهذا الوقت ندر

واتغنا بالفرايد واتخيّل
واتحدا واتعدا واتصدر

واترجا ياغزيل... ياغزيل
ياجمال يجعل القلب يتخدر

لو بغيت ايكيل الحب المكيّل
والله ان وزن الغلا ماهو يقدر

والعواذل باللكاعه و التحيّل
مالهم حيله على الحب المبدر

السحاب اللي مخيله مايسيّل
مايورده الضمان ومايصدر

اعرف ان العقل مسلوب الخبيّل
وحبة الجدري من فراش المجدر

خيال الضيقا وانا ابنك ياوعيّل
اشهد ان وقتي مع ذولا مهدر

الجمل شقران حمله مايميّل
ياصل المقصود كان الله قدر

وعلموا الطرقي محمد بن سبيّل
علموه اني خويه كان حدر