عسا السحاب الي نشا وتردف قنوفه - سعد سالم

عسا السحاب الي نشا وتردف قنوفه
يعم الجزيره والهبايب يسوقنه

ترا البر يطرب من مشافيه ويشوفه
تحنه من الويلات لاجن بياطنه

نباته جديد كيف ابوصف وصوفه
يذكرك بالآيات ماقيل فالجنه

عطية كريمً يعطي الخير بصنوفه
كريمً رحومً لاعطا ماتبع المنه

يشوّقك نبت(ن) زاف في راس قفقوفه
نبته جديدً والخباري ساقنه

تشوف البيوت اللي على العز بضيوفه
دلاله تشوق وصوت نجره الا دنه

ببيت الكريم اللي يشوقك في حوفه
يحوف الدلال ويبسط النفس في فنه

كريمً شجاعً مايحسّب لمصروفه
ويفرح الا شاف الركايب تنصنه

ترا الوقت هاذا ماتهنى بمعروفه
ياليت الليالي ماخذنه يردنه

اشوف الزمان اللي علي هب عاصوفه
وعزيل من سود الليالي توطنه

واصلي على اللي يشمل الخلق معروفه
نبياً هدا للخير ومثبت السنه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر