فلسطين - عبدالمحسن المسعودي

امرك ولاقربت حولك يضيع الباب
وتشابه علي الارض واندم على الجية

حدودك على كثر التفاتي عليها حجاب
او اني شمالي والمداخل جنوبية

اجيك بلزوم ولا يسد اللزوم عتاب
سلامة شموخك من يدين اليهودية

تمشيت من ساحل شواطيك للمرقاب
قصيدي وانا واثنين مارد وجنية

قصيدة عنب وعذوق والا عذوق اعناب
قلايد تخاطفها يدين الحرامية

تبينا نصير احزاب حنا ترانا احزاب
تبيها جماعية لعينك جماعية

تبيها تطيح ارقاب منها تطيح ارقاب
كتبها شمالي والمواجع شمالية

تبيها عن الغياب فبشر عن الغياب
تبيها وداعية تراها وداعية

وابي منك لاصارت عيون الرجال حراب
تشطر عن امواج الذليل وشواطية

تسامى ولبسنا التسامي غتر وثياب
فداك القصيد وعجرفاته وراعية

على شانك ارهيت المياسم بدون حساب
على القلب لامالت لغيرك كراسية

من اجلك مدحت اشناب لكن حقرت اشناب
فلسطين تكفيه الدماء الفدائية

شواطيك والزيتون والقدس والمحراب
فخرها فلسطيني عباته سعودية

ولامن نزلها غراب يرحل وابوه غراب
يدور على الغردق مكان لمواطية

صخيين بالاعمار ونموت دون تراب
بسلاح نزل جبريل فيه وسطع ضية

تعلمت كيف اقرا الحروف وشريت كتاب
لقيت الدليل انها ارادة الاهية

اباسامح اللي قال شاعر معاه اسباب
كتبها وله فيها مصالح سياسية

تعجل برايه تايه الراي ليته غاب
قصيدي مكانه في مكاتب وزارية

ولاتنشده لاغاب في غيبته وش جاب
سمين المعاني ماتفارق مسارية

وطينا على روس الافاعي وخشم الداب
بليل تقول الكحل الاسود بناخية

عسفناالاصايل يوم عرقت عقب مهذاب
مراجل عروبة والعقيدة إسلامية

وانا شاعرك يالقدس لك بالحشا دولاب
واشرع لك البيبان شوق وحسن نية

فقدتك وانا في الباب واكتب وانافي الباب
تشابه علي الدرب واسأل عن الجية

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر