ســـلامتك ياسلـووم - محمد المرشدي

تقول العلوم طوال قلت العلوم علوم
خفايا علومن طالبك لاتفقدها

ولابه جديد الا سلامتك ياسلوم
ويكفيك روس اقلامها جاك واردها

يقولون ل النايم ليافاق صح النوم
ويقولون ياراع الخطا لاتعودها

اذا منت معطى فحذر انك تجي محروم
رجالن متقوى جلدها لاتجالدها

انا مثل ماقلت الك لو ماني بملزوم
اعلمك لكن لجل غلطتك بوردها

انا من رجالن باللقى ينطحون القوم
وقول وفعل وانكان مااوفيتها عدها

محب الخطا لكن لا جاء فرقت السوم
اليا شبها مقرود ماني بمخمدها

على ضو كل اللي سبق صدر المرسوم
تقدم مزكيها على شان شاهدها

كلامن صحيح ولاعلى وارده ملطوم
ولااقول كلمه غير وانا موكدها

انا خابرك ياضايق البال فيك هموم
وبدت تتضح علتك لوكنت جاحدها

وانا اعرف علومك قبل يسري بك الجاثوم
ونقاط الوصول اشوم عنها ماحددها

ولاقلت لك تكرم ولااقولك محشوم
وااذا هالقلاده لايقه لك تقلدها

© 2024 - موقع الشعر