ياحظ انا طالبك ركز معايه - سعيد الشواطي

ياحظ أنا طالبك ركز معايه
خلك شمالي لو غدا العلم كايد

لا شك أنا في المبتدى والنهايه
أحس بك لكن خلك محايد

إذا رجيتك ضعف حقق رجايه
وإذا نخيتك فز حسب العوايد

إن طاب علمي قم وحقق منايه
وأفزع مثل فزعة هلي بالشدايد

خلك نظر عيني وخلك عصايه
اذا غدت عيني تعاف الجرايد

أنا أدري أن الناس لو صرت آيه
ما تذكرك والعكس وقت الهدايد

يعني تحاسبني بغيري كفايه
هذا عتب ياحظ أو حب زايد

أنا علي أعطيك حق الولايه
وأنته عساني ما اعدمك كون قايد

قايد عصامي له مع الطيب رايه
راية وفا تطفي لهيب الوقايد

ما ينثني عزمه بدرب الهدايه
نال الجوايز وانفرد بالقلايد

وأبشر بعزك لو تركز معايه
باشيد بك وأكتب لعينك قصايد

© 2024 - موقع الشعر