يقول من نومه - محمد المصعبي

يقول من نومه سرت به هجوسي
وأمسا سهير العين والفكر محتاس

سهران من همن بجوفه يحوسي
سهران لاما الصبح بانت له أنفاس

وينظم قصيدن له يريح النفوسي
كتب على قرطاس من صادق احساس

من ونةٍ للقلب بعد الغلوسي
ونة شجاعٍ ٍ شهم للضيق فجاس

باعو شروا فيه العرب بالفلوسي
وهو ولا له علم في لعب الأخساس

باعوه لأعدا منه جاهم يئوسي
ساقت على قتله جوايز مع كاس

عدوان ماتهنا منام وجلوسي
دامه على الدنيامع الناس له راس

وفي بر خالي مابه الا الطعوسي
ساقوه لخصومٍ على شوفه أحماس

ولاح لعدوه تحت وضح الشموسي
ورجاله أقفت ماتبا ذكر نوماس

حمس خفوقه حمس بنٍ ٍ حموسي
كن الغضب فالراس يقرع له أجراس

قصده يموت بعز مابه نكوسي
ما قر حاير يضرب أخماس بأسداس

باشرهم الطلقات وكسٌر رؤوسي
وأصطاب صوبٍ خلفّه منهدم ساس

صوب أبوشرشور من صتع روسي
وأقفوا وهو منصابن قاطع الياس

ويشوف من حوله عشوبٍ يبوسي
ورياح عجاجه قفا هب نسناس

وأنا كذا حظي وحالي نحوسي
من ثقل همي صايب القلب وسواس

أطرد ورى الدنيا وتمشي عكوسي
وتروح قدامي لغيري من الناس

ترقا لها مرقاب صفحه ملوسي
وأرقى لها المرقاب توطي هي أنكاس

أقول هانت غير خابت حدوسي
خابت هقاوي مسجله فوق قرطاس

والخل زعلان ٍ ودونه حروسي
لا رحت أبا لقياه لاقيت حراس

دنيا خسيسه ماتراعي الحسوسي
لاهي ولا ناسٍ ٍ بها أشكال وأجناس

ماخذت منها الا العبر والدروسي
أشوف منها الويل وأقول لاباس

وان كانت الدنيا حبارى تحوسي
فأنا لها دايم كما حر قرناس

© 2024 - موقع الشعر