الحب العتيق

لـ أغراب، ، بواسطة غادة العلوي، في غير مُحدد

الحب العتيق - أغراب

ما قلت لك ! لا جار وقتك / والملا بعينك / يضيق !
تعال / اشيل الهم / عن قلبك / وانا اشرب / علقمه !

وما قلت لي ! انك لها / لا ثارت بقلبي حريق !
تطفي شموع الياس / و تضوي بي / امآل ٍ معتمه !

وش فيك !! يوم ٍ زاد نفسك حملها / ما لا تطيق
صديت / كني من وجودك قبل موتي / معدمه !!

وانا التي / أحتاج اعيشك لا غدى حزنك عميق
أذاكر الهمّ في عيونك / واستفيده / وافهمه !

وانا التي / شديت حبل العشق من /عهد ٍ وثيق
وحلفت / لرضي سرّ بالك / قبل ما ينطق فمه !

وانا التي / اخترت اكون الأهل دونك / والرفيق
وانا التي ارفع جبينك عز / وغيرك اهزمه !

أنا / المحبه والأخوه وان تبي / اوفى صديق
ما يكفي اني صرت اشوف الموت / لعيونك سمه !

ما قالو / ان الحب / شيمه تضحيه وحس ٍ رقيق
وان الأمل / من غير حب ليلة مسافر مظلمه !

ما قالو / ان الشوق/ ناره جنة الحب العتيق
وان العتب / إلى روى بيض النوايا / مكرمه !

والله / لو هم يحسبون النبض / بحساب ٍ دقيق
ما يعلم الانسان كم له نبض / الله يعلمه

تعال / وارمي كل ما بك وسط بحر ٍ بك غريق
ثم احسب النجم بعيوني / لاشتعل بي / وارجمه

واذا تبي انحر ضلوعي / بيت واسوار وطريق
وابني صروح الخوف لجلك لا غمرني / واهدمه

واذا تبي تجعل خفوقي حلم / علّه ما يفيق
لو انتظارك مقتلي / قرة عيوني / مبسمه

ان ما جعلت / الليل / دونك من مصابيحي بريق
وان ما تركت / النوح / جرح ٍ مات واحيى / بلسمه

وان / ما نثرت العمر / بيدك / صبح ورد ٍ بك : يليق
وان ما نذرت / الحرف / يصبح منك / اعظم ملحمه

ما اكون / ذيك اللي تقول / ان جار وقتك / لا تضيق
بعينك الدنيا / وان اكوي الهم / واشرب علقمه !

© 2024 - موقع الشعر