,, برق اليأس ,,

عنا الهم والمديون والفقر والمحتاج
تلاقت وبرق الياس لوّاح من فوقه

وجودي وجوده كل ماشع صبح وباج
وجود العشيق اللي غدر فيه معشوقه

على اللي يحطّ لباب وصله مية مزلاج
حداها كما بدر (ن) على من بغى يحوقه

تغلّي .. وبخل بالوصل والدّلع منهاج
يقول التغلّي حق من أبسط حقوقه

وانا لوّ اعدّد ما يسبّب لي الازعاج ??
يبي لي سنة وانا اتردّد على سوقه !!

لكن يا جميل القدّ حبّك كما الامواج
كما عصفها لاجات بالشوق مطفوقه

وطلّتك لامنها لفت كنّها هدّاج
وياردْه من حالتْه تنبيك عن شوقه ّّ

غيابك كما الصالي .. وانا له سواة الصاج
حليم (ن) يبي نبت اللقا تفرع اعذوقه

تشاويت .. وازريت آتبحّث عن المخراج
كما دمّ فعروق (ن) من التيه منتوقه

هموم المفارق فج ّ ولّا الهموم ؟ افواج
كما وبل غيم (ن) فالسما لاحت بروقه

ترا يا الغضي شمس الهجر مالها سجّاج
وسحب الصبر منّك غدت شبه مسروقه !

وعين المعزة شجها نورها الوهّاج !!
حلالاه لا لاح الوصل واشتعل ذوقه

ف طيفك غدى لي من ظلام التجافي سراج
ويرحم عروق (ن) من عبار امس مخنوقة

وعقلي على طيف الذوابح غدى ينعاج
وعلى شبحها يفتلّ وايضيّع طروقه !!!

علي بالحرام انّك لجرح المحبّ علاج
دوا (ن) له لاقام وسجّ واتّسعت فتوقه

فلا تنشغل يا زاكي العرق بالهرّاج
كلام العواذل ؟ سفههم طبّه و عوقه

مشاعر هدفها سدّ بحر الخطا لاهاج
وتعديل مقدي الدرب لا شان منطوقه