يا شذى عطر القصيد اقبل ورش بيوته
شفني أرسم قاعدة شعر النبط وأبنيها
راكب الي لمعت السبع على كبوته
ويش أوصفها ياربي ويش أباحليها
كنها شاطي بحر يوم يوم يتطارد حوته
او كما خبرا على الطينه صفا صافيها
جيب لكزس برمجة سلفه على ريموته
يستمد ألوان فضية ويستمديها
كن واجهته من أصناف الذهب منحوته
ولمعت جنوطه وبوديه تمرّا فيها
ان نطحته تقل هداف(ن) هدفه يشوته
وان قفيته شبه ذيب(ن) غارته ناويها
وان تعرض كنه اللي سبقه مفلوته
أشقر(ن) يهوي على صيده ولايخطيها
وداخلي الكشن صالة محتكر تايوته
صالة(ن) عبد اللطيف بمحتوت بانيها
ساع حطت مويته ومرايته وزيوته
حي والله هالجيوب وحي من يشريها
ان مشى صحراء من السرعة طغا طاغوته
وان مشى فالمدن حساده طغا طاغيها
لو تحط اذنك لكشمانه ماتسمع صوته
يمكن أنك تستشك ودقته تثنيها
سايقه مافت فوق المرتبه بسكوته
ولاعرف طعم الكابتشينو ولايشريها
استدار من الرياض وطرقته منعوته
المارج للقصيم ليا سرى يعطيها
ومع أذان الفجر قدام الصلاة تفوته
واصل(ن) دخنه صلاة الصبح ويصليها
وعقب ماصلى الصلاة الساعه الموقوته
نحره كساب قولة نعم هو راعيها
واحد(ن) ماصار عرض لهرجة الشاموته
فاتح(ن) باب المضيف وكلمته حاميها
ماقعد يحسب خساير ماخسر في كروته
ماحسب مخسار حايلها ولاحاشيها
لافي اللي فايت(ن) بالطيب قبل يفوته
ذخر قوم(ن) نهج حاضرها على ماضيها
ذخر حرب أهل(ن) فعول كلها مثبوته
ثابت التاريخ يمليها لمستمليها
وعقب ما أنهى ضيافته والعلم جات وقوته
سلمه زرف القضية قال أنا قاضيها
قصة المرسل يفكر والهموم تشوته
اسمع الدعوى بصوته لين تستوفيها
اشتكي خسران ماني من خسر بيلوته
خاسر(ن) عذرا يهيّض خاطري طاريها
مالها جوال حتى أسجله ف النوته
بنت بدوان تصبّح دار وتماسيها
شفتها صدفة وبهت وفرصتي مبهوته
قلت ويش انتي وتتعلم ولا يمديها
وعقبها ترجع ديرنا والدير موقوته
وتكثر الحّوال ناقلها على ماشيها
واتتبعهم وادور نزلها لافوته
جالها عامين يالافي ومتباطيها
ويوم جيت الياالفريق بويته وفروته
ليا انها تزهم على المقهور ويباريها
واتحرى فرصة(ن) في لفة(ن) ملفوته
ودي آخذ عهدها وابدي على واليها
ولاش فرصه والعرب شماتة(ن) مشموته
خفت ممن يشعل الفتنه ومن ينشيها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين