الدانه

لـ بدر ال شافي، ، في غير مُحدد

الدانه - بدر ال شافي

الشاعر اللي ينومس روس شيبانه
يطمر على بيرق الإبدآع ويبوقه

والشاعر اللي تهابد فيه كرعانه
يركب على موتره للبيت ويسوقه

واللي بيوته من الاخلاق عريانه
ودك تصكه على وجهه بطابوقه

واللي قصيده مثبت فيه سيسانه
تسلم يمينه وصح الله منطوووقه

والشعر للشاعر اخلاقه وعنوانه
يحفظ مقامه ويحفظ عنده حقوقه

والناس ماتستوي في بدع قيفانه
تكرمه لحيه وعشرين الف محلوقه

ما كٍل من غاص بحر الشعر (حمدااانه)
ولا (ولد زايد) اللي حاكمٍ طوقه

مهما تحلق طيور الجوّ باشجااانه
تبقى نجوم السما ماهي بملحوقه

هذا كلام العقل لا رجح ميزااانه
مستنصره بالضمير الحي وعروقه

ياساحة الشعر كبدي حيل ضميانه
وعروق كبدي من الاحداث محروقه

اتابع الشعر واحداثه وميدانه
واشوف الاوضاع منكوبه ومخنوقه

الشعر حاسوه ورعانه وخبلانه
وتشابهت فيه سراقه ومسروقه

كلنٍ يغني حسب موجات وديانه
وحسب النظام اللذي يمشي على ذوقه

احدنٍ يغنيه من قلبه وشريانه
ويجر موالها من وسط معلوقه

واحدٍ كتبها مجرد يرضي اعوانه
ومطفوق هايط علينا لجل مطفووقه

والنقد مسلوبه احكامه وميزااانه
والعدل والصدق بين الناس مبيوقه

يالجنة الشعر والتحكيم واعيااانه
من ينصف الشاعر اللي لاحت بروووقه

اللي فرد فضته عن صوغ مرجااانه
وسرد من الفكر فكره حيل مرموووقه

والكلمه اللي تجي في اخر الدااانه
كلمة ضميرٍ يخاف حساب من فوقه

الله يعز الشعر في ظل (حمدااانه)
وفي ظل (ابو خالد) اللي صان طاروقه

ذولا خوال الشعر وعيال عمااانه
ومناصرينه وحكامه ومعشوقه

© 2024 - موقع الشعر