جعله على هضب المخاريم همّال - محمد بن باني المخاريم

عسا سحابٍ بارقه يشعل اشعال
انشى من القبله ترازم رعوده

وربرب طهاه وصارت مزونه ثقال
وسكر هواه وصب صادق بروده

جعله على هضب المخاريم همّال
يسيّل شعابه ويملى سدوده

سيلٍ يعم الهضب وديان وجبال
من جود من يضفي على الناس جوده

واليا خذا له فترةٍ عقب ما سال
عشرين يومٍ بالحساب معدوده

ينبت جديد العشب ويربّع المال
وكلٍ على مشهاه يرعى بذوده

هذاك رحالٍ وهذاك نزّال
يرعون عشبٍ سامكاتٍ فنوده

يازين شيعت زاهره تشرح البال
لاحرّكه في الصبح نسناس نوده

والنار مشبوبه ودلّه وفنجال
في مجلسٍ راع الخنا ما يروده

ما يدهله من لا له اول ولا تال
واللي بهرج الزور يشعب قعوده

ولا يروده صاحب القيل والقال
اللي ليا اوحاله كلامٍ يزوده

مافيه كود معرب الجد و الخال
كل ابلجٍ يفخر بماضي جدوده

ارجال معروفين بالطيب و اجلال
ما حطّوا اعلوم الدقاقه طروده

ولا لحقهم شك في كل الاحوال
اهل ثقه والطيب ترقا سنوده

ارجال مافيهم من الكبر مثقال
يوم الردي بالكبر يفتل عضوده

علمٍ راعي الكبر ماهوب رجال
وعند الله اضعف واحدٍ من جنوده

© 2024 - موقع الشعر