يتيمه

لـ مشهور القليطي، ، في غير مُحدد

يتيمه - مشهور القليطي

يحوم الشعر في جوفي ويكتب بالمسا كلمات
ويبلل بيض اوراقي قبل فيض الدموع إتلوح

تجدد هالمساء جرحٍ تخلل في صميم الذات
من ايام الموادع ذيك حزني ع الملا مكبوح

تعانق صفحتي عبره ..تبرر باقي العبرات
يتيمه مثل راعيها وتخفي حزنها المفضوح

من ظيمّ الزمن عدت نفسها حسبت الاموات
يعاندها الامل دايم ويوصد بابه المفتوح

غريبه حالة المحزون يجدد للحزن وقفات
غريبه سجّت افكاره في درب الهنيه إتشوح

يقلبها على المضمون ويلقى بعينها لمحات
يعودها على الضحكه وترجع للحزن وتنوح

يتيمه صدق قالوها يتيمه في زمان آفات
يتيمه حزنها دفاق وقاضي عدلها مذبوح

تبات عيون خلق الله وهدبها ساهر مابات
حرمها لذة المرقاد وأظلم عينها بوضوح

تآخى في حناياها صليل السيف والطعنات
تصرخ بالخفى لكن تعبها صوتها المبحوح

تنادي ظلمة الشارع وتكتم صوتها الآهات
ويردد في مسامعها صوت لحزنها مصدوح

تبدد حلمها تبكي وترسل حرفها صرخات
بعد ماذاب مبسمها وضيّق صدرها المشروح

طويلة قصتي ياجرح..اليمة قصة الدمعات
وأدعي ربنا يفرج همومي والحروف تبوح

أبسكت دامني طولت وباقي لقصتي وقفات
واشوف الليل يستأذن وهذي نجمته بتروح

ابغفى بمرقدي لكن .. مناية ان يكون سبات
تعبت اصافح افكاري واعانق غربتي بالروح

واناظر نجمة الظلمة واعانق غربة النجمات
وأرسم صفحة اوراقي أماني بابها مفتوح

الا ياصبح لاتصبح طلبتك .. رجعه لوفات
وخلي ظلمته تشفي نزيف بقلبها المجروح

© 2024 - موقع الشعر