يارب انا بـحماك يافارج الضيق - حمود بن رادعه

يارب انا بحماك يافارج الضيق
من ضيقةٍ تاتي على كل حزه

منها يفوح الصدر فوحة الاباريق
الصدر صار ابريق والضيق قزه

ما غير اسلي خاطري بالطواريق
والقلب سكين الطواري تحزه

مثل الذي يغفي له شوي ويفيق
ويفارقه حلو الكرى لاتنزه

واحيان دمعي يعصي العين ويريق
ماهوب دمع الذل دمع المعزه

ماحدّني للضيق عشق العواشيق
والقلب لا هب الهوى مايهزه

ولانيب احاتي هرج بعض المخاليق
سود الضماير لو الاجسام رزه

ماحدّني شيٍ يحز المعاليق
مخفيه حتى من رفيقٍ أعزه

اصبر.واجامل.واطلب الرب توفيق
واصد عن درب الردى واتنزه

لو كان اعيّن.يوم ميت من الضيق
ما اسلى مع اللي مايبي لي معزه

© 2024 - موقع الشعر