جفوة الآمال

حبيبي والأمل رمشه على شوفك يجيه خبال
رجيتك لو تداعب بي غناوي تعزف لحونك

أحبك اعشقك واشقى ومادري هل انا عالبال ؟
قصيدي ما هوى غيرك ولا بعدك ولا دونك

حبيبي ملَّت حروفٍ كسرها رمحك المنهال
تجي كل القصايد شوق تترامى على متونك

أحبك حب لو يدري به العالم يشيخ الحال
أجي كلي وفا لأجلك وأحبك موت وأصونك

وأجي لك بالدفا عمري و فرحٍ عانق الأطلال
ولو كل المدا يقسى أنا و الله ما أخونك

أبي أغفى بأحضانك أببكي جفوة الترحال
أبي تمسح لي دموعي واتوه هناك في كونك

أنا والله يا قلبي بعمري تبخل الآمال
رجيتك حس بضلوعي سنيني حيل يبكونك

أحبك إيه انا احبك ولو ليل التلاقي طال
أبيك ولا أبي غيرك وأشوف الكون بعيونك