أمر المحبين ...

يوم القمر ينثر على الغيم ضوَّه
والليل ينسج من خيوطه شعاعي

والحب جرحه ما لقى له بروَّه
والجوف بعده صار حيل متداعي

مبطي علامه غايتي في دنوَّه
وانا مع الخطوه يزيد اندفاعي

يابدر ضاوي مهتني في علوَّه
وش فيه نجمه ما يريد ارتفاعي

ملِّيت اناظر وانتظر واتأوَّه
والدمع خيَّم بالعيون الوساعي

والحرف يومه في غرامه تفوَّه
ينشده باللي خافقي له يراعي

شاعرك واقف عند هالباب توَّه
يهديك عمره مع حياته متاعي

والله لو تدري من تكون جوَّه
كانك بكيت اللي من العمر ضاعي

لو كان لي بامر المحبين قوَّه
لأركب بحورٍ ما تمل السواعي

ربَّانها قلبٍ سعى في سموَّه
بالله عوَّد لا تزيد التياعي

خذها حياتي واللي تبغاه سوَّه
من دون حبك مالهالعمر داعي

بالله تكفى كون لليل ضوَّه
يحرق ترى بالحيل جمر الوداعي