لساني خانني بصغري - طيف النعيمي

أنا والليل كنا اصحاب وصار الليل في ضدي
زعل مني القمر واقفى وخلاني بظلام الليل

أناجي ليلي المعتم ودمعاتي على خدي
يعاندي ولا يسمع وحالي مابقى به حيل

يراودني الحزن والهم أشوفه في سما حدي
وأمطار الألم تهطل وتجرفني عيون السيل

إلى وادي الأسى تاخذني آهاتي ولا ودي
أبين علتي لكن أزيد الآه بالترتيل

لساني خانني بصغري ولا بيّحت أبد سدي
كتمت آهاتي في صدري عسى الحاله بها تبديل؟

عليم الله ياعالم تعيسه بجزري ومدي
أبي صرخاتي تسبقني ولكن مالها توصيل

جزأ مني مخاصمني وصار الوقت في ضدي
أنادي بصوتي في نفسي عسى يرضى علي الليل

© 2024 - موقع الشعر