روس النوايف ..!! - القاسميه

الا ياذيب وينك فاقدك ضلعي الا ياذيب
بعد كنت الوحيد اللي على ضلعي يخاشرني

فقدك المرقب العالي ونادا مير ماش مجيب
وانا ضلعي طويل ويمه الاشواق تامرني

فقدك الليل والمسرا الطويل ومرتعي والطيب
بَعَدْك الغيم في روس النوايف مايحاصرني

تعبت ألد صوب اربع جهات اليا سمعت قنيب
واعاين حظي الاقشر على نومه يداحرني

تشكل صورتك في نون عيني مدتن وتغيب
وامني ناظري في شوفتك والقلب عاذرني

خذاك الوقت ليت الوقت يوم انه خذاك يجيب
يعوضني عن غيابك وفي همي يشاطرني

نشدت سهيل عنّك مير نجمه مايعرف الغيب
وصاح سهيل ياذيب الخلا عوّد وسامرني

طفا نجم السما وانا السما والوقت له ترتيب
عليك الله ترجع لي تعب شكي يساورني

علامك ..! كل مارمع في وصالك معك رمعي يخيب
وانا ياويش في لغز الغياب اليوم جابرني

ترفق عاين بصدري همومي شامخات النيب
مراعيها بحمى جوفي وتملكني وتاسرني

ومن حولي سباع (ن)جايعه تخطي وخوف تصيب
وانا حظي معك ياذيب ناهرني وقاهرني

سواتك وسمها بالقلب ميسمها عذاب وريب
كوتني صدتك والحب من فعلتك دامرني

ياأمّا انك تعود وتنهي الالآم والتعذيب
او انك تِرْجِع العمر الكبير اللي تِصَاغرني

© 2022 - موقع الشعر