روعة البرقع

سيّدة عقلي رضت والا زعلت
من غلاها شايفاً معروفها

اقنعت سلطان عقلي ونزلت
تستضيف القلب داخل جوفها

كل ما يرخص سواها هي غلت
مغلياً حتى اسمها وحروفها

وكل ما شانت سواها هي حلت
في عيوني تنفرد بوصوفها

هي جميلة خلق ما تجمّلت
من مساحيقاً غلي مصروفها

طرفها مكحول ما تكحّلت
عيطموس وضامراً سرجوفها

ما حلا كان ادبرت والا اقبلت
اعتدال وميلها بردوفها

تفرق القذله اثنين وعدّلت
فوق قذلتها طرف نفنوفها

روعة البرقع عليها كمّلت
سطوة النظره وحد سيوفها

لجلجت بعيونها ثم ارسلت
نظرةً لا زلت اعيش صدوفها

سلهمت سود الرموش وحلّلت
انتزاع القلب من ملهوفها

زيّن الشيطان ذبحي وفعلت
شفت قلبي ينتفض بكفوفها

السنين بوصلها ما طوّلت
مابقى الا حبها وطيوفها

الليالي نزّلت روسً علت
ترتجف كل البشر من خوفها

والعواذل عارفه والا جهلت
القلوب اسعادها بشفوفها

كانها عن حب مغليها سلت
ما جفتني واجبرتها ظروفها

من هذاك الوقت وسنيناً خلت
ما نسيت ولا قدرت اشوفها