ســلام يالـلـي جـعـل الانــذال تـفــداك - خليف الوهيداني

سلام ياللي جعل الانذال تفداك
يالشامخ اللي مثل هضبت طميه

من اي ناس تكون شعري تنصاك
طارن طرى من ضيقت البال ليه

لوطبت مره بس وحده بدنياك
في وقفت(ن)حليت فيها قضيه

عندي انا ياطيب الفال كفاك
حتى ولو جيتك ولا طبت فيه

وسلم على اللي ماتجمل بيسراك
لا بالكلام ولا مواقف حميه

مشكور ياللي تكتب المدح مناك
وسام منك وعندي اكبر هديه

ابا امدحك لكن ماني بوياك
حصر المدايح فيك يصعب عليه

يسراك ماتدري عن انفاق يمناك
لنك من ابنا شيوخ نجد العذيه

شف الشعر وشلون من بعد ناجاك
في خطته وسراره الداخليه

على النقى والعز والطيب حياك
ماله ورا ماقال مقصد ونيه

نطق السان ونيت القلب تخفاك
والله عليم البينه والخفيه

ويمكن من القراب تطلع لك أعداك
وكل الحياه تذوق منه الاذيه

وتموت ماجيته بابيته ولاجاك
ويفرح ليا شافك بحاله رديه

وفي كل مجلس بالمسبه تقفاك
ونفسه على نهرك وسبك جريه

لو أنت ماتبخل عليه بعطاياك
يبحث خفاك ولا يشوف العطيه

ويمكن بعيد الناس بالفعل يرفاك
وياقف معك بالهينه والقويه

من ماسمع في حزت الضيق شكواك
وقت الرخا كل(ن)غني عن خويه

واللي تشوف مناه بعدك وفرقاك
أبعد عنه لو عشت بارضآ خليه

أبعد عن الا نذال قربك وممساك
لو رحت في دار المعزه ضحيه

وأحسن بامن حولك وربعك نواياك
.ولايزملك من نيته شقلبيه

وأصبر ورب الخلق بالخير يجزاك
كم واحدن شاف الفرج من وليه

يالادمي لو تحترص من خطاياك
ان ماحماك الله وطيت الخطيه

أمش بطريق الصدق والله يحماك
ومن الخطايا النفس ماهي بريه

ويالشعر أنا في بعض الايام لولاك
ضاقت عليه من جميع النحيه

لولاي أجر الصوت وسرج مطاياك
وفيك أتوسع عن همومي شويه

ماقام حظي لا هنيا ولا هناك
ولا سقت مع صف النشاما المطيه

ولو ماحسبت حساب منا ومناك
عشت العمر من دون دار وهويه

ويادرب يادرب الردا مامشيناك
ونفوسنا عن رفقت أهلك غنيه

ويالازام اللي بالعسر ماقضيناك
ماانت بشهاده لنفوس الدنيه

يالازم أنقوم بك لا من قدرناك
ونجعلك يالازم بوجهك هديه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر