أرجوك .. كل الحكي معروف .. من بدري
مافيه داعي تعيده .. شوف لك غيره
تدري ..! أبآشاركك .. باللي شغل فكري
وخل السوالف .. ( رحى ).. وقلوبنا تديره
سنتين مرت وأشوف الثالثة .. تجري
وحنا نجامل .. وكل ٍ بان تقصيره
قد قلت لك من زمان .. إن غبت من عذري
ما قوى على الهم والغربال والغيره
وشلون أبقوى .. ودم فراقنا يسري
بعروق الأيام .. من كان الصدر .. ( ديرة )
لين أثقل الهم كتفي .. وإنحنا ظهري
ودنقّت .. والبال .. طاح بكفة الحيرة
وماشفت . بعيونك النعّاس .. من قدري
غير إني اللي كِسر خَاطر مشاويره
تذكر .. قبل كم سنة يوم الجفا يطري !
وتقول لي : بس عاد .. وفضها سيرة
كنت إنت ..؟ ولا أظن إني أنا آهذري ؟
أو هو حلم .. يشتكي من كِذب تفسيره
بالحالتين .. الحبر جَف ْ.. بورق عمري
ولا عاد ينفع نعيد ..اللي قِضى خيره
يا أعز من ب..أتركه للبُعد .. وأستَذري
تحت ( إني الطهر .. وإنه درب ما آسيره )
خلاص .. كل ٍ يدور له طريق .. أدري .!
ما نيب أبشكي .. جعل بفراقنا خيرة !
من كم سنة كنت أعز إحساس في صدري
واليوم دار الزمان .. و ( فضها سيرة )

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين