ياركب اللي ماورد من بلد بوش
عليه لليابان رمز ومواري
في اكس آر اسمه على الباب منقوش
ومصممينه للمدن والصحاري
شكل الجناح بموخره تقل طربوش
ماهو مرهم بالمحل التجاري
لاناشته رشه ..ولادق شاكوش
ولادار ويله بين يائع وشاري
نزل من المينا على ساحة الحوش
ابناخي الكزس عدو السفاري
يزعل من النمره لياناشته نوش
وعند الدبل يعلن ظروف الطواري
مثل الشجيع اليا اعتزا حزة الهوش
وهز القناه وقال يابا الثواري
ولياشتغل واقف تقل ينقد اقروش
صوت المذيعه بالقرار الوزاري
يسرح صلاة الصبح من حي فدغوش
ليا طرا في بعض الاحيان طاري
لياصار ماتملك من الذود قنطوش
ولانته مولع بالقنص والحباري
ومليت من جو المدينه ومديوش
وتبغى تسلي خاطرك بالبراري
نصه لرجال ٍ على الطيب مدهوش
اللي بفعله كل حربي يماري
قال الطهيمي قلت نعمين واشوش
حربي وابين فرحتي وافتخاري
راعي مضيف ٍ به مسايير وطروش
والكيف يدرج وازرق العود جاري
وله مجلس ٍ من زل شيراز مفروش
شيد من اجل الطيب ماهو جباري
ومزينه حب الولع لام دندوش
اللي لها تو الحوير يماري
وضح ٍ وبرهن تقل بالثلج مرشوش
من حر ماله ماكسبهن عواري
وان كان بكره حاشن الجايزه حوش
والله لاشجع طول صوتي واماري
موقف شرف ماهو مزيف ومغشوش
يسوى الرصيد بكل بنك ٍ عقاري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر