نـــــازح البين

يامن غدى من دونها نازح البين
عليك عيني كل دمع (ن) تثرّه

واللي لبيته يقبلون المصلين
إنك لعينى الحب00والشوق قرّه

لكّن عيا وقتي الصلّف والشين
لايترك لساق المسرّات جرّه

من دونك البيداء 00وعصّف الخماسين
اللي لحقّها في صلفّها تجرّه

وانا عليهّ 00نذر ماأرخصك يازين
لكّن لي حظ (ن) توارى مقرّه

لاجيت آباريبه00وسّم كل ضلعين
ولاشاف لي ثوب (ن) من الحب طرّه

وانتي تنحيتي وذقت الآمرين
والهم ثوبه فوق الاضلاع زرّه

عجزّت أدورّ في غيابك عناوين
وعجزّت لا ألقالي من الغيد حرّه

ياكثرماضمت بيوت الميامين
بس الهوى ماأحدّ (ن) من الخود سرّه

انا كرهت الدار عقب المقفين
يالله بوجهك من زماني وشرّه

قررت آبرحل00بس مدري على وين
مير الوكاد اني آباروح مرّه

يمكن اوجه شرق دار أبن حثلين
صوب الهواجر في قطر وآل مرّه

مدام يحداني شبّا قلّتي لين
أسقى عروقي كل حنظل ومرّه

ودي اعنّز بس ربعي مريفين
ماوقفوا للي نصيبه يحرّه

مانيب ظالمهم على العسر واللين
عماة من سود النوايا تغرّه

اليا قدح خشم الفتيله00مزابين
وإليا أحتموا الميقاف ماأحد (ن) يعرّه

مقباسهم يصّلا00على زرّب غازين
يوم الردي بقعاء تصك00وتفرّه

ياعرفهم للجود شوق المساكين
وياجهلهم باللي ضلوعي تصرّه

والا إجلوي سعد الخوي واقف (ن) بين
أخوه إبن عمه00وبين المضرّه

ياليت مثله عن قصى قومي إثنين
مالحقني من صالي الجمر حرّه

يومه ذرى ربعه صعوط المجانين
عريب جدّ 00وخال00لله درّه

لكّن مايدري وإش اللي قذى العين
العين مالقيت من الغيد قرّه