اضرب براسك على الطوفه

حبيبتي ترا ماني بحكي البشر مكلوف
ومثلك يعرف ان اكثر الناس ملقوفة

على الهون لا تشطح وتطلع من المالوف
مثل منت خابر كل واحد له اظروفه

انا لا بغيت العب ابالعب على المكشوف
مثل لعبك اللي تحسبني ماانا اشوفه

سكنت بعيون من غلاتك ماهي بتشوف
عيون المحب اللي عن الذنب مصروفة

تمخطر وقم واقعد بقلبي بليا خوف
تراك الوحيد اللي قدر ينتزع خوفه

على كثر ما مره من اشهى الغرام صنوف
الى ذاق من صنف يخليه ويعوفه

يموت بظماه ولا شرب لايث مجروف
ولا يرجي الهتان لا شحت اقنوفه

أخيرا وصلت وقلت للقلب جوك ضيوف
وانا اعرف خفوقي زين ما يكرم ضيوفه

وعلى غيرعادة فزلك فزة الملهوف
يهلي ومن زود الطرب يضرب ادفوفه

وصرت بهواك العاشق المغرم الملقوف
واذا ما اعجبك فاضرب براسك على الطوفه!