حبيني و رديني

ابكي على الحال مدري الحال يبكيني
والله مدري ولكن وضعنا مزري

عقب المعاميل هوجاسي يراكيني
ماغير اعدد جروح الوقت في صدري

ذكرى على الشارع الخلفي توديني
وذكرى تمثل روايه والبطل صبري

وذكرى مع الدم تمشي في شراييني
وانا مع الذكريات آهيم واهذري

ياعازف الناي خذني لك وغنيني
واذا تقطعت بالاوتار من عذري

ماقول (اشوف) الليالي سود في عيني
دامي (اعيش) الليالي السود من صغري

مدري متى ياحياة الضيم تعطيني
يكفي قتلتي جميع الضحك في ثغري

ياللي تحبين حبيني ورديني
ياكيف اخاويك والوجهه على قبري

اقري حياتي اذا يمديك تقريني
يمكن تحسين بالآلآم من يدري؟؟

ولاتحكمين بضميرك من عناويني
اقري خفايه بوسط الحرف وبسطري

اذا تودين شوف الضيم شوفيني
الضيم اصلا كتبه الله من حبري

واذا تودين شوف الشمس جافيني
النور عتمه ترى ماهو على خبري

ابحرت ضايع دخيل الله تبكيني
يكفيني ابكي من اول يوم في عمري