ياصاحبي

ياصاحبي مليت كثر الترجي
وبذلت مجهودي من اجل التفاجي

يا خشف ريمن في فلاته يهجي
ما قط حطوه البشر فالسياجي

ماذيره تفاق خلقن تسجي
تنوي على الفرجه بعيد النهاجي

ياعل داره ناوين له يثجي
لين ايغطا قاعه سواة الزجاجي

ويركّد اللي ثار رملن وعجي
ويملى نفوس الخلق بالابتهاجي

أبو ثمانن كنها صبّ ثلجي
سبحان خالقها بليا انفلاجي

أهواه لو غيري هواه الفرنجي
له في وسط قلبي قبول ورواجي

طاريه دايم به قصيدي ينِجِّي
نوج البَخَتْري عقب وبل الثجاجي

ويحيط بَطْرَاسي معا كل فجي
برواز نادر مصدره قرن عاجي

مازلت محري في هواهم وارجي
لين القدر يسمح لنا بالتفاجي

والخاتمه فيك الرجا يامنجِّي
لطفك وعفوك مطلبي واحتياجي